Pothuajse tre miliardë njerëz në planet nuk kanë mundësi të përballojnë një dietë të shëndetshme, teksa çmimi i ushqimit të mirë është rritur ndjeshëm në vitet e fundit. Sipas Kombeve të Bashkuara, gjatë pesë viteve të fundit, çmimi botëror i një diete të shëndetshme është rritur me 25%, duke e tejkaluar nivelin e varfërisë ekstreme – jetesa me më pak se 3.00 dollarë (2.62 euro) në ditë.
“Si rezultat, 2.69 miliardë njerëz, pothuajse një në çdo tre persona në botë, ende nuk mund të përballojnë një dietë të shëndetshme”, tha Máximo Torero Cullen, kryeekonomist i Organizatës së Ushqimit dhe Bujqësisë (FAO) në Kombet e Bashkuara, duke folur me gazetarët përpara lançimit të raportit “Gjendja e Sigurisë Ushqimore dhe Ushqyerja në Botë” më 21 korrik.
“Kaloritë janë relativisht të lira,” tha Torero, “por ushqimi nuk është.”
Drithërat dhe perimet rrënjë, që janë burimet kryesore të ushqimit të përditshëm dhe sigurojnë pjesën më të madhe të kalorive, zënë vetëm 13% të shpenzimeve për një dietë të shëndetshme.
“Në të kundërt, frutat dhe perimet ofrojnë vetëm 5% të kalorive, por përbëjnë 16% të kostos, pra dukshëm më të shtrenjta se drithërat, dhe ushqimet me origjinë shtazore përbëjnë pothuajse 30% të kostos,” vuri në dukje Torero.
“Prandaj, sfida nuk është të prodhohen kalori të mjaftueshme, por të bëhen ushqimet e pasura me lëndë ushqyese më të përballueshme,” tha ai. Sipas Organizatës Botërore të Shëndetësisë (OBSH), një dietë e pashëndetshme është një nga rreziqet kryesore që ndikojnë në barrën globale të sëmundjeve, veçanërisht për sëmundjet jo të transmetueshme si sëmundjet kardiovaskulare, diabeti dhe kanceri.
