Fshati Xhan, në zonën e Dukagjinit, po jep një shembull të veçantë të bashkimit dhe përkushtimit ndaj vendlindjes. Banorët dhe emigrantët me origjinë nga ky fshat kanë vendosur të financojnë vetë ndërtimin e rrugës që lidh shtëpitë e të parëve, duke investuar nga kursimet e tyre.
Nën moton “Xhani na thërret”, dhjetëra familje që jetojnë prej vitesh në Kanada, SHBA, Itali, Angli, Francë dhe Gjermani kanë bashkuar kontributet për të përmirësuar infrastrukturën e fshatit, duke treguar se lidhja me vendlindjen mbetet e fortë pavarësisht emigrimit.
Punimet kanë nisur pas bekimit të dhënë sipas traditës së zonës. Një nga investimet kryesore ka qenë blerja e një fadrome, e cila po përdoret për hapjen dhe sistemimin e rrugës që të çon drejt banesave të fshatit.
Kjo nuk është nisma e parë e komunitetit. Në vitet e fundit janë financuar edhe restaurimi i ish-shkollës së fshatit, ruajtja e banesave të trashëguara dhe ndërhyrje për përmirësimin e rrugëve të brendshme.
Një kontribut të rëndësishëm ka dhënë emigranti Sokol Sterbyçi, i cili siguroi fadromën që po kryen punimet, duke i dhënë shtysë realizimit të projektit që banorët e kanë pagëzuar “Rruga e Shpresës”.
Për banorët e Xhanit, kjo nismë është më shumë se një investim në infrastrukturë. Ajo përfaqëson ruajtjen e historisë, traditës dhe lidhjes me rrënjët, si edhe një model frymëzues për komunitetet e tjera të zonave malore që duan të mbajnë gjallë vendlindjen e tyre.
Foto ilustruese
