Këshilli i Ministrave ka miratuar një vendim që shpall 7 zona me prioritet për zhvillimin e ekonomisë malore në bashkinë Fushë-Arrëz, si pjesë e zbatimit të ligjit “Për paketën e maleve”. Ky veprim ka si qëllim të stimulojë investimet dhe të avancojë aktivitetet ekonomike, industriale dhe turistike në këto zona malore, duke ofruar mundësi të reja për zhvillimin e ekonomisë lokale dhe komuniteteve që banojnë aty.
Siç përcaktohet në vendim, zonat e shpallura në Fushë-Arrëz përfshijnë një sipërfaqe totale prej rreth 19 188 hektarësh dhe përbëhen nga këto njësi:
- Blerim, Trun, Qebik dhe Dardhë
- Fierzë, Kokdodë dhe Aprip-Guri
- Porav, Arst dhe Mëzi
- Fushë-Arrëz, Miçaj, Lumbardhë dhe Tuç
- Iballë dhe Berishë e Sipërme
- Mërtur
- Kryezi, Qafë-Mali dhe Lajthizë
Qeveria nënvizon se në këto zone do të krijohen kushte të favorshme për zhvillimin e projekteve në turizmin malor, aktivitete ekonomike dhe industri, me qëllimin e rritjes së investimeve dhe parandalimin e braktisjes së zonave malore.
Shtrirja, kufijtë dhe pikat e hyrjes dhe daljes për secilën zonë do të përcaktohen në hartat zyrtare, sipas sistemit të kornizës referuese gjeodezike shqiptare (KRGJSH), që do të bashkëlidhen me vendimin.
Për zbatimin e këtij vendimi janë ngarkuar Ministria e Ekonomisë dhe Inovacionit, Agjencia Shtetërore e Kadastrës dhe Bashkia Fushë-Arrëz. Vendimi do të hyjë në fuqi pas publikimit në Fletoren Zyrtare.
