Një nga pikat panoramike më të frekuentuara në zonën e Rrjollit, pranë Shëngjinit, po përballet me një problem të vazhdueshëm ndotjeje, duke shkaktuar pakënaqësi te vizitorët dhe turistët.
Pamjet e siguruara nga zona tregojnë grumbuj mbeturinash të shpërndara në afërsi të pikës panoramike, duke dëmtuar jo vetëm peizazhin natyror, por edhe përvojën e atyre që zgjedhin ta vizitojnë.
Sipas denoncimeve të qytetarëve, një pjesë e mbetjeve është grumbulluar në qese, por pastrimi nuk është përfunduar plotësisht. Ndërkohë, hedhja e vazhdueshme e mbeturinave nga persona të papërgjegjshëm po e përkeqëson situatën.
Vizitorët i bëjnë thirrje Bashkisë Lezhë dhe institucioneve përgjegjëse të ndërhyjnë sa më parë për pastrimin dhe mirëmbajtjen e kësaj zone, e cila konsiderohet një nga atraksionet më të bukura panoramike të bregdetit verior.
