Armëpushimi i brishtë mes Shteteve të Bashkuara dhe Iranit është vënë sërish në provë, pasi forcat amerikane goditën dronë dhe sisteme radarësh iranianë, ndërsa Irani lëshoi raketa drejt bazave ushtarake amerikane në Gjirin Persik.
Ushtria amerikane tha se sulmet erdhën si përgjigje ndaj katër dronëve iranianë të tipit “sulm njëkahësh”, të lëshuar drejt Ngushticës së Hormuzit, të cilët, sipas saj, “përbënin një kërcënim të menjëhershëm për trafikun detar në rajon”. Komanda Qendrore e SHBA-së (CENTCOM) bëri të ditur se dronët u rrëzuan.
Teherani i cilësoi sulmet amerikane si një shkelje “flagrante” të marrëveshjes së armëpushimit mes dy vendeve.
Irani u kundërpërgjigj duke lëshuar raketa balistike ndaj dy bazave ajrore amerikane në Kuvajt, si dhe ndaj objekteve të Marinës Amerikane në Bahrein, raportoi agjencia iraniane e lajmeve IRIB.
Bahreini dhe Kuvajti i dënuan sulmet, duke deklaruar se zjarri me dronë dhe raketa ishte zmbrapsur me sukses.
CENTCOM tha se vlerësimet paraprake tregojnë se nga shtatë raketat iraniane të lëshuara drejt dy shteteve të Gjirit, gjashtë u interceptuan, ndërsa njëra nuk arriti objektivin e saj.
Edhe Emiratet e Bashkuara Arabe dhe Katari dënuan sulmet iraniane ndaj vendeve fqinje të Gjirit.
Ministria e Jashtme iraniane deklaroi në një njoftim se sulmet amerikane ndaj instalimeve të radarëve në Sirik dhe në ishullin Qeshm përbëjnë një shkelje “flagrante” të armëpushimit dhe “një sulm ndaj sovranitetit kombëtar dhe integritetit territorial të Republikës Islamike të Iranit”, sipas agjencive të lajmeve.
